បច្ចុប្បន្ន សមាគមសហគ្រិនវ័យក្មេងកម្ពុជា មានសមាជិកប្រមាណជា ៦០០ នាក់ដែលតំណាងឱ្យក្រុមហ៊ុនប្រហែល ១៨០០ ក្រុមហ៊ុន ស្ថិតនៅរាជធានីភ្នំពេញ ខេត្តសៀមរាប ខេត្តបន្ទាយមានជ័យ ខេត្តបាត់ដំបង ខេត្តកំពង់ចាម ខេត្តត្បូងឃ្មុំ ខេត្តក្រចេះ ខេត្តព្រះសីហនុ ខេត្ត កំពត និងខេត្តកែប។ សមាគមក៏កំពុងធ្វើការយ៉ាងសកម្មក្នុងការរៀបចំបង្កើតសាខាសមាគមក្នុងខេត្តកោះកុង ខេត្តកំពង់ស្ពឺ និងខេត្តពោធិ៍សាត់នៅក្នុងឆ្នាំបន្តបន្ទាប់ទៀត ហើយសមាគមបានដាក់គោលដៅបើកសាខាឱ្យបានគ្រប់ខេត្តទូទាំងប្រទេសកម្ពុជា នៅត្រឹមដំណាច់ឆ្នាំ ២០២៦។ គោលបំណងសំខាន់គឺដើម្បីចងក្រងសហគ្រិនវ័យក្មេងទូទាំងប្រទេស ចូលរួមជាប្រតិបត្តិករសេដ្ឋកិច្ច អភិវឌ្ឍសហគ្រិនភាព និងរួមគ្នាលើកម្ពស់សេដ្ឋកិច្ចជាតិ។

សមាគមសហគ្រិនវ័យក្មេងកម្ពុជាមានចក្ខុវិស័យជួយដល់សហគ្រាសធុនមីក្រូ តូច និងមធ្យមនៅកម្ពុជា ឱ្យឈានទៅរកការធ្វើអាជីវកម្មបែបឌីជីថល បរិយាបន្ន និងភាពច្នៃប្រឌិត ដើម្បីតាមទាន់នូវការវិវត្តរបស់បច្ចេកវិទ្យាឥតឈប់ឈរ។ យោងតាមការសិក្សារបស់សមាគមអំពីបញ្ហាប្រឈមរបស់សហគ្រិន​នៅកម្ពុជាកន្លងមកឃើញថា សហគ្រិន និងម្ចាស់អាជីវកម្មបាននិងកំពុងជួបបញ្ហាជាច្រើន ក្នុងនោះរួមមាន កង្វះលទ្ធភាពទទួលបានហិរញ្ញប្បទានបំណុល និងវិនិយោគទុន កង្វះធនធានមនុស្សដែលមានជំនាញ និងផលិតភាពខ្ពស់ និងកង្វះលទ្ធភាពទាញយកប្រយោជន៍ពីបច្ចេកវិទ្យាឌីជីថល ព្រមទាំងបញ្ហាមួយចំនួនផ្សេងទៀត។ ដូច្នេះ សមាគមបានដាក់ចេញនូវទិសដៅយុទ្ធសាស្ត្រ ២០២០​-២០២៥ ចំនួន ៦ សំខាន់ៗ (បច្ចុប្បន្នកំពុងសិក្សាដាក់ចេញទិសដៅយុទ្ធសាស្ត្រ ២០២៦-២០៣០) ដើម្បីជាផែនការប្រតិបត្តិការស្នូលនៃសកម្មភាពរបស់សមាគម រួមមាន៖

១. បង្កើនលទ្ធភាពក្នុងការទទួលបានហិរញ្ញប្បទានធនាគារ និងទុនវិនិយោគដល់សហគ្រិន ជាពិសេសសមាជិក
២. ពង្រឹងសមត្ថភាពសហគ្រិនលើជំនាញឌីជីថល អាជីវកម្មបរិយាបន្ន និងនវានុវត្តន៍
៣. ពង្រឹងកម្លាំងពលកម្មជំនាញ ពង្រីកទីផ្សារការងារ និងអនាគតទីផ្សារការងារអាស៊ាន
៤. ចូលរួមជាមួយរាជរដ្ឋាភិបាលក្នុងការបង្កើតគោលនយោបាយ និងយន្តការនានាដើម្បីគាំទ្រដល់សហគ្រាសធុនមីក្រូ តូច និងមធ្យម
៥. បង្កើនកិច្ចសហប្រត្តិបត្តិការអន្តរជាតិ និងទីផ្សារសម្រាប់ពាណិជ្ជកម្ម និងអាជីកម្មរបស់សហគ្រិន ជាពិសេសសមាជិក
៦. បង្កើនចំនួនសមាជិក ពង្រីកសាខា និងអភិវឌ្ឍស្ថាប័នប្រកបដោយចីរភាព។